Bajram Morina: Kobor buteder Roma si ki lista e alosaribaski, so majzoralo glaso e komunitetosko
0
Vakti: 2 min.
Nacionalno Konsilo Rromengo Nacionalno Minoritetosko si majbaro reprezentativo organo e Rromengo ande Srbija, responsibilo palo uštipe kolektivo hakajengo ande kotora katar sićope, kultura, informacije thaj oficijalno hasnipe čhibako thaj ramosarimasko.
Foto: Romanenevimata
Bajram Morina generalno sekretari taro Nacionalno konsili e Romengo vakergja bašo rola thaj importanca akale institucijake, sar ini o pharipa savencar arakhena pe o Romano komuniteti.
Morina sikavgya kay yekh kotar sherune butya e Nacionalune Konsilesko sito te ovel modo mashkar o Romano komuniteti thay themutne institucie, sar ini te del suporti e dizutnenge vash te phiraven olenge hakaya.
“Sakova membro e romane komunitetesko shay te boldelpe ani Nacionaluno konsili vash informaciya, azhutipe thay sovlipe ano thana kola siton ano amaro jurisdikciya. Amen rodla te ova aksesibilno e manushenge ani sasti Srbiya thay te laqhara o problemya kola arakhenpe khetane e lokalune instituciyencar ano tereni”, akcentingya o Morina.
Specialno akcenti ko vakti taro vakeribe sine thodino upral edukacia, savi o Nacionalno Konsilo e Romengo dikhel sar ključno bašo lačharipe e romane komunitetoskoro than. Morina vakergja pe godi kaj o Konsilo but berša kerel buti te promovirinel edukacia e romane čhavenge, suporto e sikljovnenge thaj studentonge, sar ini te informišinen e ternen bašo šajipa so dena afirmativne mere kana ramosaren pe ko maškarutne škole thaj univerzitetura.
O Nacionalno Konsilo aktivno promovirinel edukacia sar majimportantno drom te ikljolpe kotar o čorolipa thaj socialno marginalizacia.
Prekal olesko vakeribe, ko agorutne berša dikhlola progreso kana si ko lafi taro numero taro terne Roma so lundjaren piri edukacia palo fundavno škola, numa akana si but pharipa save kerena lenge phare te oven pherdo integriribe ko amalipa.
“Maj kay kergyola signifikantno progresi, o Roma ji akana isiton anglo čorolipa, predrasude, diskriminaciya thay pharo akseso vash nesave servisya. Odoleske sito vasno te lolpe buti vash edukacia, ekonomikano zoralipe thay may baro kotorleipe e Romengo ano keripe e deciziyengo”vakergya Morina, akcentingya kay o stereotipya siton ji akana yekh kotar o may bare pharipa vash o romano komuniteti.
Ko vakeribe vash o avutne alosaripya vash nacionalune konsilya e nacionalune minoritetyengo, kola manglape te oven ji pe oktobri 2026. bersh, Morina akharda sa e membrya e romane komunitetesko te registrinen pe ani Specialuni Lista e alosaribaski e Romane nacionalune minoriteteski.
“Phandipe ani Lista e Specialune Alosaripnaski siton angleder kondicie vash te len kotor ano alosaripya. Numay odola kola siton ramosarde isilen hakay te alosaren, numay ini te oven kandidatya. Odoleske sito vasno kay may but amare dizutnenge te vastinen akava hakay thay aktivune te len kotor ano alosaripe e reprezentyengo”,vakergya Morina.
Ov evaluingya kay may baro involviripe e Romengo ano procesya e deciziyengo siton esencijalno vash te reslol o problemya kola arakhenape e komuniteta, akcentingya kay o progresi shay te reslol numay kotar o khetani buti e instituciyengo, organizaciyengo thay membryengo e romane komunitetesko.
O.V.